Sunday, February 17, 2013

కృతజ్ఞతలు ....రాళ్ళు రప్పలు,సువాసనల ప్రేమలు



నన్నొక సారి  కలకలంలా 
కనుక్కున్నందుకు 


నా కిరణాల వేళ్ళకి 
పూలు పుట్టిన్చినందుకు 
ఆ గాలుల తడిసిన శరీరాలు 
మానని పాటలు 
చెక్కుకునేలా చేసినందుకు


తేనె కుండీలో మునిగిన పదాల్ని  
నా శరీరం మీద 
ఏరినందుకు 


ఖాళీ మట్టి కుండలో 
మిగిలిన శూన్యాన్ని 
అక్షరాల తో ఆడించినందుకు 


నా ఊరి కల్లెడ వాగులో 
ఎండిపోయిన నత్తగుల్లని 
పట్టుకొచ్చి నందుకు 


ముక్కలు ముక్కలైన దుఃఖాన్ని  
ఒకచోట చేర్చి 
నా వీపు మీద అంటిచ్చినందుకు 


రంధ్రాలలోంచి కారిపోతున్న 
కాలాన్ని రంగరించి 
చుక్కలు చుక్కలు గా చప్పరించమని 
నోటికి మురిపిచ్చినందుకు 


సెగలు సెగలౌతున్న రక్తాన్ని 
వెన్నతో తడిపి 
పేగుల్లోకి ఎక్కించినందుకు 


కనరాని తోవల్ని
దారికాచి బిగవట్టి 
నా కాల్లముందర పరిచినందుకు 


నన్నొక సారి 
కన్నీళ్ళలా కన్నందుకు.


      .....


Saturday, February 16, 2013

తెలియనితనం వెంట



వెలిగించ లేని సమయాలు 
దగ్గరనుండే వెళ్ళిపోతాయి 
ఒక దాపు దొరకక 
గీసే చిత్రం దారి తప్పుతుంది 


అనాధ ఎవరో తెలియని 
మనసు 


పనీ పాటల సాయంత్రాలు 
చెమట గాలుల మీదుగా కరిగిపోతాయి 
ఈరోజోక ప్రశ్న 
రేపటికి సమాధానం తయారు కాలేదు 


నడక తెలియని వారే 
అందరూ నడుస్తూ వుంటారు 


చేతులు కలుస్తూ వుంటాయి 
కాళ్ళు విడి పోతుంటాయి 
జీవితం పెనవేసుకునే 
మర్మం 
అంతుపట్టక ముందే 
క్యూ పెరుగుతూనే వుంటుంది 


ఏదీ తెలుసుకోకుండానే 
కథ నిద్ర పోతుంది .

       .....

Friday, February 8, 2013

చలిమంచు జలపాతం లో.....




మంచు మఖమల్ మనసు మీద 
నడిచి రా...!


ఇక్కడ ఆకాశం విరిసి
ప్రవహించిన గాలులు 
నింపుకున్న నేరేడు ,చింత వేప సోయగాలు 
నిలువెల్లా మీటడానికి  
నీ నాద శరీరం సిద్ధమేనా...!


పక్షులు నేర్చుకున్న రాగాల 
పరవశం నీకోసం 
గుప్పెట్లో పట్టి ఉంచుకున్నాయి.


చలిగింతలు 
మాటు కాస్తున్నాయి 


పండు ఊహల సవ్వడి 
వినటానికి 
చిటారు కొమ్మల చిలిపి చిగురాకులు 
నిశ్శబ్దంగా ...
చూపుల్ని భద్రపరిచాయి.


వేకువలో జారిపోయే 
ఈ పచ్చని వెన్నెల తాగగలిగితే 
అమరత్వం దగ్గరగా జరుగుతుంది.


గుండెని భద్రంగా 
అమలినంగా పట్టుకొని రా...!


ఒలకని సౌందర్యసత్త్వం 
నిండుగా నింపుకొని పొదువు...


          .....

Thursday, February 7, 2013

కాలం వెంట ...3



కలలు తీరని అలలు
ఊగిసలాటలు ఆపవు

తడి పాదాలు చూసుకుంటూ
నడుచుకుంటూ .....
ఆలోచన్లు అవయవాల్ని
ఒదిలేస్తాయి

నిశ్శబ్ధం చుట్టుపక్కల
ఒక సవ్వడి గర్వంగా పొడుచు కొస్తుంది

అలల్లేని మహా సముద్రాన్ని
గల గల పారుకుంటూ
మీటుకుంటూ....
కౌగిలిలో కలిసి పోతావు

సమయం ఇంకిపోతుంది

అటూ ఇటూ సూర్యుడు
కొంత ఆశని కలుపుతుంటాడు

సొందర్యానికి
సవరణ మొదలౌతుంది
బొట్టు బొట్టు గా
ఆకాశం కరిగి పోతుంది .

.....
19.1.2013.

కాలం వెంట...2

 

సముద్రం నీ కాళ్ళు 
కడుగుతున్నపుడు 

ఆకాశం నీలం అలలై
వాలుతున్నపుడు 

మనుషులు తమ ఆకారాల్ని విడవకుండా 
పరవశించి పొతున్నపుడు 

దిక్కులు కరిగి పోయి 
కన్నీటి బిందువులో ఇంకిపోయినపుడు 

తడిసి పోతున్న రాళ్ళూ రప్పలు 
పులకిస్తున్న గుట్టలు గుండ్లు 
నిశ్శబ్దరాగాల్ని ఆలపిస్తున్నపుడు 

మంచు చలిముత్యాల్లా 
స్పర్శిస్తున్నప్పుడు 

వెగటు దాపరికాల మేకప్ తొలగి 
గులక రాల్లై గుచ్చుకునేటప్పుడు 

నడకలు కనుపాపల్ని 
అనుకరించనప్పుడు 

పసిపాప బుడి బుడి పాదాల ఒత్తిడి దుఃఖం 
నీ గుండె మీద కదులుతున్నపుడు 

ఆనందుడా...!
దోసిలి పట్టి వినమ్రంగా 
జీవితం ముందు మోకరిల్లడమే.

.....
16.1.2013.

DR. GURUSWAMY PULIPATI .